(七) 说表二

说表呢,弗但要编写得好,而且还要表达得好。掌握搭运用好说表是评弹艺人表演艺术当中很重要个一个方面。平常我伲说,一个艺人书说得好弗好,也就是指个俚能弗能运用好说表。说闲话呢,人人会说;说书呢,倒弗是人人侪会说个。因为说书啦,除脱要组织好说表,用词要精确、生动,更主要个呢还要掌握好语音、语气、语调,要拿说表个内容根据思想感情要求,恰当个传达畀了听众。说书人为了要满足听众艺术欣赏搭审美个要求,说表个辰光呢要主要到自家个音色、音质、力度、速度。好个说表赛过像唱歌一样,轻、重、快、慢,一样等粗,侪有一定个法度。音色呢又要悦耳动听,强弱、高低形成对比,对听众呢自有一种魅力。说表好个要讲究精、气、神个完备,而最主要个呢,是一个“情”字。情感要饱满,有了内在个感情,那么喏,以情带声,才能够口呈心言。那么现在呢,请老听众听脱一段录音,就是刘天韵勒《老地堡》第三回当中个一段录音,搿个刘天韵勒浪演老地堡搿个角色就可以说,俚是以情带声了感情饱满。先请听一段 刘天韵 个说表:

[录音片段]

那么喏,接下来就是讲评弹啦俚是有个体表演个艺术。俚个说表呢往往带有各自个个性。俚个说表造诣深个、水平高个侪能够形成功独特个风格。过去呢,评弹艺人拿说功呢,根据俚个特点做几个大个分类,比方火功、阴功、快口、慢口、滑口(也就活口啦),俚个花头满多个。火功说书呢,要考究嗓音清亮,精、气、神侪足。有时呢,越说越响,越说越有劲。内行讲起来就叫铮、铮、铮。那么中年演员张振华呢可以说是一位火功个典型,现在伲放一段张振华个中篇评弹《神弹子》第一回书当中个片段:

[录音片段]

那么搿个就是火功个典型哉。那么阴功呢,阴功个说书啦,语言精练,考究韵、神兼备,不慌不忙,丝丝入扣。已故弹词名家周玉泉就阴功个典型。现在请听一段周玉泉《文武香球》打擂台个一段说表:

[录音片段]

搿段阴功呢,确实是说得清爽。【蒋月泉插话】那么,伲搿个先生,我插两句哦,俚静功,俚个说书是非常噱。而且俚个噱头呢搭俚个说书结合得很紧。阴噱。俚是阴噱。有种是硬噱,俚是阴噱。俚搿个静功呢,搿个说书啊,语言运用得非常好。俚弗是一个讲解,俚勒浪交代搿些情节个辰光呢,你看周先生俚交代呢,哈,搭搿听客是亲切得来,歇歇赛过要商量个口气。讲家常。倷 …. 倷看啊是。搿么倷想哪亨来事呢。倷 …. 倷说啊对。亲切得来。交代得了干干净净。俚搿个语言呢丰富、幽默、风趣。搿打擂台么,倷想,照规矩总归哔哔叭叭。俚是,俚搿个打擂台啦,叫听打擂台,弗是看打擂台。俚个动作、架子只是一个附属而已。交代得了清清爽爽,连下来俚还有搿种阴噱。俚弗是一本正经放噱头,俚搿种噱头倷弗噱也弗碍经个,弗难为情个啦。弗是一本正经哏嘴哏嘴像做生活实梗,搿个就呒趣相哉。所以,周先生搿说书说得炉火纯青。搿么我是语气也呒不,学不像个。搿倷客气。额,真个。搿个物事要年龄、性个,搿一整套个物事。倷硬学,俚搿两声书倷学得一字弗差,倷弗来三个。现场听勒浪要肉麻个呀,有点做作个啦,??做作。搿反而弗适宜听客,啊是。喏,我也要搭汝等商量,啊是,啊是。哎,就是周先生各个静功。搿个再讲滑口,就是活口啦。活口个说表呢,是考究灵活、生动,善于安排穿插噱头。有时呢,接景生情,妙语如珠。像评话老艺人张鸿声就是一位滑口。那么请听一段张鸿声《英烈》当中个一段录音:

[录音片段]

搿么,搿段录音呢放过了,就说明 张鸿声 勒浪迭个穿插噱头、外插花了、包括肉里噱方面呢,确确实实是有功夫。俚非但自家个角色起得好,说功好,外加搿个噱头好。搿个是评弹个理、味、趣、细、技啊,搿趣啦,有趣啦,迭个很重要个一点。当然,所谓火功啦、阴功啦、滑口啦等等,只是大个分类。有名个艺人是风格各不相同个。所以我伲勒下一期个评弹知识讲座里向呢,还要拿些名家,像蒋月泉啊、杨振雄啊、严雪亭啊,倷覅客气,哦呦娘,迭个是名家呀,不过?一点点罢哉, 张鉴庭了、 姚荫梅 ,各人有各人说表个特点呢,勒下一期个评弹知识讲座里讲畀诸位听。现在个知识讲座就讲到此地。

此条目发表在评弹知识讲座分类目录,贴了, 标签。将固定链接加入收藏夹。

发表评论