网友户乖如邻:学说苏州话,用评弹音诵读《少年行》

大家好,我是淮语吧的户乖如邻。今朝勒浪该搭点我想搭大家谈谈我是哪哼学苏州闲话个。

我个母语是江淮洪巢片合肥小片个六安闲话。我小辰光就比较注意去寻伲自家个方言搭普通闲话个对应个关系。譬方讲伲方言里向个E、o、e、oe 对应个是普通闲话里向个ai、ao、ei、ou,但不过还是……当时辰光就是因为弗晓得有入声箇个一种声调个存在,所以就弗晓得哪哼会得伲方言里向个“tsheh”对应个是普通闲话里向个chāi。后首来我8岁个辰光就搬到仔广州去住。勒浪广州就学会仔广州闲话。该个对伲后首来去学音(韵)学也是有比较大个帮助个。

我勒浪10岁还是14岁个辰光就有一天实生头里【实生头里:突然】穷想晓得古代人是哪哼讲闲话个。所以我就开始去了解一点音韵学方面个基础个知识。过后勒浪初两个暑假,就买仔一本《广韵》,一本《广韵韵图》。基本浪向可以讲就是从箇个辰光开始进入仔自学音韵学个一个大门。到仔高一个下半学期,我自家就是对箇个中古汉语个音韵系统比较了解则。箇末过后我就开始用箇个一套系统去对方言进行对照个比较。箇歇辰光我记得我自家就是做仔从X韵到上海闲话个演变个关系。箇末,做仔箇个演变关系过后呢,我自家拿箇个一套规则记牢。用仔差方弗多一个礼拜我就讲上海闲话则。因为上海闲话,倷晓得俚个连读变调是比较简单个,但不过,当时辰光讲出来个上海闲话就像一个纫嘴讲个。所以后首来就要多听多看上海闲话个节目,去积累词汇。

箇末有仔上海闲话个基础过后末,我是勒浪2013年个10月份开始学苏州闲话个。10月份开始学苏州闲话呢,当时辰光……苏州闲话因为俚箇个音频视频资料还是比较多个。所以我就上网浪向去寻资料来看。基本浪向看得最多个还是《施斌聊斋》。还有就是各种个评弹个记录。学仔差方弗多三个号头【号头:月】过后,我勒浪14年个元旦到苏州去白相个辰光,我基本浪向朆畀人家认得出来我是外地人。基本浪向……假使说倷想拿一只方言学得标准、学得像、学得让别人家听弗出来倷是一个外地人个说法呢,我觉着有几点是穷重要个。第一点倷个音韵学个知识一定要扎实,倷有仔音韵学个知识过后呢。别人家勒浪学该个字哪哼哪哼读,但是倷晓得音韵学过后倷就可以拿箇个规则、拿95%以上个字一秒之内搞定。第二点,我觉着非常要紧个一点就是倷要多听多读。因为语言个物事最重要个还是去模仿。呒不模仿就呒不办法开口。

最后我想以一只诗词个朗诵来结束该只音频。因为我觉着苏州闲话是全中国读书最最好听一种方言,而且我打算用评弹音个文读来读我最欢喜个一道诗,就是王维个《少年行》。

《少年行》,王维。新丰美酒斗十千,咸阳游侠多少年。相逢意气为君饮,系马高楼垂柳边。汉家君臣欢宴终,高议云台论战功。天子临轩赐侯印,将军佩出明光宫。出身仕汉羽林郎,初随骠骑战渔阳。孰知不向边庭苦,纵死犹闻侠骨香。一身能擘两雕弧,虏骑千重只似无。偏坐金鞍调白羽,纷纷射杀五单于。

此条目发表在 系列活动 分类目录。将固定链接加入收藏夹。

网友户乖如邻:学说苏州话,用评弹音诵读《少年行》》有 2 条评论

  1. 苦露酷亿 说:

    《少年行》大赞!

  2. 无风水面 说:

    乖乖,这是个语言学习天才,只能膜拜。其实大多都不是天才,只能靠坚持和努力。

发表评论