我小辰光格事体，好像就勒眼睛门前，叫啥转眼之间，我就要变成功一个年近七十个古稀老老头哉！日脚过得啊要快。“光阴似箭，日月如梭”，箇（读作“搿”，这，下同）句老话么说得真个一点也弗错嘅！

“我是一个畀（读作“拨”，被；给）人勒阎罗王箇搭抢转来个人！”箇句闲话讲畀勒恁厾（读近似“唔笃”，你们）听，恐怕是呒畀一个人会相信有实梗个事体。既然呒畀人相信实梗格事体，搿么，就让我来拿我出世辰光个经过讲畀勒大家听听。当然我自家是弗可能晓得自家出世辰光个经过嘅，下面箇点事体也侪是爷娘勒我记事之后反复告诉我嘅。

我姓朱，生勒吴县黄埭镇（现在属苏州市相城区管辖）。姆妈生我个年是 1941 年，箇辰光称“民国三十年”，是东洋人侵略伲中国，苏州、上海、无锡一带到处兵荒马乱。勒浪生我之前，因为日本鬼子勒离开伲祖屋后头约摸二三十公尺以外，一个名叫 “ 后仓场 ” 格场化掼仔只炸弹，吓得伲爷娘弗敢再登勒屋里向哉，就带仔我一个阿哥、一个阿姐一淘出去逃难。后塞来，一则，是听说呒畀东洋人下来扰民，老屋里也比较安定哉，二则之间，我勒伲娘胎里，也接近要临产哉，再加上我勒伲娘胎里个胎位弗正，像是个难产个样子，伲爷觉着弗能再让伲娘勒外世奔跑颠波哉。就实梗，一家四口重新回到仔黄埭个自家屋里。

伲娘生我是勒浪阴历六月心里，天气最最热个辰光。本来黄埭街浪有一个科班出身个姓陈个女助产士，可以请转来搭伲娘接生。为避兵荒马乱，逃难出去仔还朆（读作“分”，不曾，没有）转来。伲爷已经托人畀信畀箇位女助产士，无论如何请俚早点转来，搭伲娘接生。啥人晓得我个出生日脚提前哉！伲娘生我箇日，临产格阵痛从大清老早就已经开始，断断续续，直到吃过仔夜饭之后，阵痛一阵接一阵，越来越稝（读作“猛”，密的意思）。看看伲娘实在熬勿牢哉，请新法助产士来接生已经呒畀希望，伲爷只好咬咬牙子，从几里路开外个乡下请仔个会老法接生个“老娘”来搭伲娘接生！

“老娘”四五十岁年纪，一双小脚，虽然走起路来身体一拗一拗，做起事体来倒是一点也弗拖泥带水，来得个爽快。看俚一歇歇辰光，要做个各种准备侪舒齐哉。箇歇辰光个规矩，家主婆生小人，自家男人是弗可以登勒旁边嘅。“老娘”对伲爷说：“大少爷，你（黄埭土话读作“呐”，苏州市区用“倷 [ 读‘奈'，你 ] ”下同）登勒旁边勿方便嘅啘，你先出去兜个圈子，散散心，转来包你抱个大胖儿（读作“尼”）子。你放心去末哉。”等伲爷跨出房间，俚就拿房门摇摇上。

箇辰光伲格爷哪里还有心思出去散心白相呢？家主婆养小人自家弗好登勒旁边个规矩，俚哪亨会弗懂？俗话说，女人养小人，一只脚勒棺材外头，一只脚勒棺材里向。对女人来说是性命交关个大事体，作为男人，伲爷心里也勒浪急。伲爷心里清爽，除脱仔耐心等待，呒畀别个办法！先勒楼中间等仔歇，又到楼下一面看书一面等消息。从房间里闯出来伲娘个叫喊声，就像锥钻勒心浪戳。伲爷拿手里个书往台子浪一厾（读作“笃”，丢），重新上楼勒楼中间里个坑床里坐下来耐心等待。

伲爷从夜饭后八点钟前后，请来个小脚“老娘”进门格辰光等起，一直到街浪巡更更夫个更锣敲过两更，依旧一屑屑动静也呒畀。心里有仔事体，巴望仔想要个物（读作“墨”）事，就觉着辰光过得特别慢。一直到深夜十点多钟，仍旧声息全无，但是房门开哉，从房间里闯出来个口信，少奶奶平安无事，小人也养出来哉。箇末纳亨听物件小人个哭声嘅呐？传信人走上两步，勒伲爷耳朵旁边轻声耳语道：“小人一出娘胎就呒畀气嘅哉。”爷一听说养格“死小倌”，马上跨步进伲姆妈个产房，先要紧进去看看伲姆妈，安慰安慰俚自家个家主婆。看见箇位“老娘”还勒浪弄箇个呒畀气“死小倌”，就说：“小人死脱么就厾脱俚仔罢，覅再去弄哉。”

“箇是舍弗得吤。蛮好一个男小倌！”小脚“老娘”说道，“我想办法一定要救活俚嘅。请大少爷，少奶奶放心么哉。”

“倷要救得活箇个小人，我一定加倍重赏。”伲爹爹对“老娘”说。爹爹勒旁边看箇位“老娘”拿个刚生出来个呒畀气个小囡，一歇歇拎仔双小脚，那个人提起来，勒屁眼浪拍打，一歇歇搭个小囡嘴对仔嘴拼命吹气，一歇歇拿自家个嘴对准仔小人个屁眼一吹一吸，就实梗来来回回，反反复复弄仔足足四十分钟，终于“哇 —— ”个一声，响亮个小人哭声划破寂静格夜空！已经死过去个我，畀箇位貌不惊人个小脚女人从阎罗王手里拿我夺仔过来。

“老娘”第一要紧拿嗷嗷待哺个我传畀伲姆妈。让我吃娘个奶。爹爹马上从袋袋里挖出廿块银洋钿交畀接生个“老娘”，实行仔伲爷对“老娘”答应个重赏。“老娘”千多万谢，高高兴兴离开伲屋里。

作者简介：
苏州黄埭人，1941年生于吴县黄埭镇，1958年7月迁居南京至今，先后就读于黄埭小学、苏州四中、南京四中，后从事房屋建筑虫害防治研究工作，爱好中外邮票、钱币收藏。
**请各位朋友尊重的作者的版权，如果我们不慎侵犯了您的版权，请您及时联系我们，我们也会立即做出回应。