气喘病，又叫做“吼病”，现在格医学名字叫做支气管哮喘。箇种毛病发作起来，一个人觉着胸口头像畀几几化化物事塞牢高仔实梗，只觉着进气短，出气长，几几乎呒不法子呼吸，喉咙里向弗断个发出“叽——诟，叽——诟”个声音，就像得仔瘟鸡病个鸡喉咙里发出来嘅箇种声音一似一样。人根本弗能平躺勒床浪，只得坐勒床浪向。坐个辰光一长，腰酸背痛，混身呒不一眼眼力气，真个只是比死人多一口气！
我就是从小就有箇种毛病个人，直到现在，只要稍微有一点点弗当心，着个瀴（读作“印”，凉），或者伤个风，只要连勒浪两个喷嚏一打。箇末叫快得邪气得来，马上就会觉着胸口头像有物事勒浪塞进来，胸口闷起来，呼吸慢慢佼弗舒畅，吼病就会开始发作起来。箇种毛病已经勒我身浪嬲夹弗清仔六十多年哉！
听伲爷娘告诉我，说我个气喘毛病是从我三、四岁辰光出痧子以后带出来嘅。“痧子”，现代医学称“麻疹”，是由“麻疹病毒”引起个一种勒婴幼儿当中传布个呼吸道传染病。现在个小人可以用接种疫苗的方法来避免罹病。我小辰光，还呒不搿种疫苗，所以差弗多每个小囡侪免弗脱出痧子个关口嘅。
就勒浪我出个痧子还朆好清个辰光，连牢仔又是一场“百日咳”。“百日咳”是中医个名字，是说搿种咳嗽个病相当弗容易好，断断续续勿停个咳嗽，约摸要咳一百日天方始会得漫漫佼个好转起来。搿个病大约相当于西医说个“肺炎”。特别是出痧子连带百日咳，是个极凶险格疾病，弄得弗好，可能就会死人！我就是搿个出痧子带出来个百日咳个咳嗽毛病，最后变成功勒我身浪嬲（读作“绕”，纠缠）夹勿清仔六十多年个老气喘病。
我小辰光，作为一个男小倌，日里总归是好动嘅。只要我日里向厌得过仔分，到夜里气喘病极可能就会发作。我个吼病一发作起来，伲姆妈就会起来陪我，一面用俚个手勒我胸口头、背心浪，前头、后头勿停个撸，想让我觉着舒服点，气喘也快一点平下来，好让我早点平平稳稳人睏下去。每到搿个辰光，伲爹爹也会马上着好衣裳，半夜三更出门，到街东横头个西药店“泰来药房”去，敲开仔药店个门，买吃气喘病个特效药转来畀我吃。搿种药片小得一眼眼，药片个名字叫“麻黄素”。搿歇辰光，中国自家还不能做搿种药片，爹爹从药店里买转来格搿种侪是外国货。药个效果极好，吃下去仔之后，气喘马上就停止，喉咙里箇种像瘟鸡叫个声音也听弗见哉，人也就能够平睏勒床浪，马上就能睏着。
本来只要勒身体起发个辰光注意饮食个营养，身体个健康搭仔生活个规律性，婴幼儿时期个某些疾病多半是能够带好嘅。我箇个人就是呒不实梗个好运气！我勒苏州市四中读高中一年级搿年（ 1957 年），也正是我身体发育个关键时期，箇年格暑假刚开始个辰光，我突然发高烧，到医院经医生一诊断，是非常严重个发热病症，西医称作“副伤寒”，马上就收下来住院治疗。刚开始个辰光，高烧 41 ℃ 。一张病危通知，吓得姆妈马上请人拿爹爹从南京喊仔转来。经过医院个抢救，总算拿我个性名保牢。勒医院里住仔一个多号头，身体虽然逐渐得到恢复，小辰光个格吼病勒箇格关键时刻就朆能够随发身那箇个病带脱，一直留我身浪，搭我嬲夹勿清到仔将近古稀之年个现在。
也因为我气喘箇个顽疾长期缠身，气喘发作起来辰光缠磨个种种痛苦，年纪渐长，慢慢佼自家也晓得要保护自家个身体哉。特别是离开学堂，走上社会以后，自觉嘅寻一点搭哮喘病个预防、治疗有关个资料、书籍来看看。晓得仔毛病源自家个过敏性体质，积累仔一点搭自家发病有关个过敏原因。还终于明白仔自家箇个病弗单单呒不根治个办法，而且还有遗传畀下一代个可能，只有通过中医药个长期调理，改善身体个健康状况，从根本浪增加自家对疾病个抵抗力，减少发病个次数、发病个频率，延缓身体体质个恶化。因此我也就勒天命之年（子曰；“五十而知天命”）对自家个人生作出了远离婚姻孓然一身个重大决定。
想通仔箇点点道理，自家反而觉着自由自在，可以无拘无束个支配自家个时间，根据自家个嗜好来安排自家个生活。