分类目录归档:评弹知识讲座

苏州评弹知识讲座。

(七) 说表二

说表呢,弗但要编写得好,而且还要表达得好。掌握搭运用好说表是评弹艺人表演艺术当中很重要个一个方面。平常我伲说,一个艺人书说得好弗好,也就是指个俚能弗能运用好说表。说闲话呢,人人会说;说书呢,倒弗是人人侪会说个。因为说书啦,除脱要组织好说表,用词要精确、生动,更主要个呢还要掌握好语音、语气、语调,要拿说表个内容根据思想感情要求,恰当个传达畀了听众。说书人为了要满足听众艺术欣赏搭审美个要求,说表个辰光呢要主要到自家个音色、音质、力度、速度。好个说表赛过像唱歌一样,轻、重、快、慢,一样等粗,侪有一定个法度。音色呢又要悦耳动听,强弱、高低形成对比,对听众呢自有一种魅力。说表好个要讲究精、气、神个完备,而最主要个呢,是一个“情”字。情感要饱满,有了内在个感情,那么喏,以情带声,才能够口呈心言。那么现在呢,请老听众听脱一段录音,就是刘天韵勒《老地堡》第三回当中个一段录音,搿个刘天韵勒浪演老地堡搿个角色就可以说,俚是以情带声了感情饱满。先请听一段 刘天韵 个说表: [录音片段]

发表在 评弹知识讲座 | 标签为 , | 留下评论

(六) 说表 一

今朝呢是评弹知识讲座个第六讲,说表——之一,由 廖望 供稿。 评弹呢又叫说书,主要呢就是用口语来表达书情。所以呢说表是评弹个主要手段,而口语呢是评弹塑造艺术形象个主要材料。离开了说表呢其它个手势、表情、弹唱等侪呒不办法表达完整个心情,塑造完整个人物形象。评弹所用个口语呢也弗同于一般日常生活个语言。一般日常生活个语言呢往往是比较粗糙,自然形态个啦,有种么繁琐,有种么还有点直,就是弗哪哼顺啦。而评弹所用个语言呢,是一种进过提炼加工个艺术语言。俚呢是比较精炼、正确、生动搭富裕形象性。现在呢我伲先请大家听一段《玄都求雨》钱笃招出场个一段表,由 刘天韵 讲: [录音片段] (评弹)刚巧刘天韵搿个一段表啦就拿钱笃招哪能出场就表出来则。评弹是通过说表来描写人物、叙述情节,勒听众个头脑里向引起各种想像搭仔联想那么产生艺术形象。评弹个说表呢,弗受时间空间个限制,是比较灵活自由。那么再经过历代一人个丰富、加工,除了用说书人个口气来叙述意外呢,再增加了书里向人物个道白。 说书人个叙述呢一般是用第三人称,搿么书里向人物个道白呢一般侪用第一人称。再由此化出来各种说白。评弹一人呢称之为六白。哪亨六白呢,就是官白、私白、咕白、表白、衬白、托白搿个六白。官白呢,就是脚色主里向讲个闲话,搿种官白呢有时啦是从昆曲啦或者京剧当中吸收过来个中州韵,有时呢也用苏白,或者呢各地个方言。譬如像《玄都求雨》当中就有实梗一段官白,搿么再请听搿段录音: [录音片段]

发表在 评弹知识讲座 | 标签为 , | 留下评论

(五) 开篇

现在呢就请听评弹讲座第五讲,由廖望同志供稿。 第五讲个名目呢叫开篇。开篇呢原来是放勒正书门前演唱,俚搭正式演唱个书目呢,勒内容浪呒不关系个,是一种附加节目。评弹呢最早啦是勒茶馆里向演出个,听书个人么可以吃茶、吃点心、吃零碎,(阿烟)搿辰光书场里蛮闹猛个。五香豆了,啥个黄莲豆了,干炒梅子,金花菜了,吃物事。那么说书呢又呒不锣鼓闹场,那么搿个一人凭一个人个喉咙要使书场里向嘈杂,罗嘈个声音静下来啊,用啥个办法呢?那么就想出来,勒正书演出之前,先拿起乐器来么,弹脱一小段。那么其他么再唱,唱一个小节目,用搿个办法让听客安静下来,然后呢再聚精会神听书。那么艺人呢,借仔搿个开篇啦,朗朗喉咙,试试嗓音。因为搿个辰光呒不啥个种定音(叫叫),弗晓得今朝个喉咙能唱到啥个程度。那么先唱只开篇呢,试试喉咙。定音定得高么,还可以打底点,定得忒底么,再(和)高点。开篇呢,所以成为叫“开”,也就是有点“开始”了、“开场”个意思。所以,最早个辰光呢对开篇要求弗高个,就是平铺直叙唱几句。 后来呢,开篇个唱词啦,比较讲究,一般是用七言为主个,俚接近唐诗。所以过去也有人称(其)为唐诗开篇。搿么开篇个作者呢,一个是演员自家,像从前个老先生马如飞阿等等侪自家写开篇个。还有种是听客,听客当中个有文化个人也写了弗少开篇。弹词开篇个题材、风格是多种多样个。有种有专门个赞颂人物个,像诸葛亮阿、李太白(阿)、岳云阿。也有呢,专门叙述故事,比方像《刀会》、《战长沙》、《杜十娘》、《林冲夜奔》、《黛玉焚稿》、《潇湘夜雨》等等。也有呢专门描绘景物个,搿只开篇里向就是唱点风景,像啥个《西湖风景》阿、《梅竹》阿等等。再有呢滑稽风趣个白话开篇,想啥个《颠倒古人》阿、啥个《螳螂做亲》,就是实梗比较有趣。那么现在呢就请听薛筱卿唱个《螳螂做亲》个片段:

发表在 评弹知识讲座 | 标签为 , | 留下评论

(四) 中篇短篇分回

请听评弹知识讲座第四讲,中篇、短篇搭仔分回,由 廖望 同志供稿。 中篇、短篇搭仔分回。传统个长篇呢是每篇一回,有俚个连续性格。倷每天听下去,听仔前头个再听后头个呢,哦哟,搿是听来搿个书呢,亦听亦有味道。但是,倘使倷当中抽个一两回出来听听呢,对书请弗大熟悉个人呢,哎,就会觉着丈二个和尚,头路也摸不着则。特别像建国以后,大家忙于工作,建设社会主义。为了适应实梗一个新个情况呢,为仔使得听众能够勒一个夜里个向,用一个夜里个辰光,听到有头有脑一个完整个故事,所以一九五二年呢,上海市人民评弹团参加《治淮》宣传回转来啦,俚笃尝试创造了一种最最新个说唱形式,啥物事呢?搿个形式一般讲起来包括三到四回,每回书大概唱四十五分钟到一个钟头左右,全部故事说完么也不过两三个钟头。为仔要区分原来个长篇形式,参考小说分类个方法呢,一般称俚为中篇。中篇演出辰光啦,有辰光评话演员搭弹词演员同台合演。哦哟,实梗一来么各显所长么各有千秋。所以,一般人称为中篇评弹。第一部中篇评弹就是上海市人民评弹团演出个《一定要把淮河修好》。现在请老听众听朱慧珍勒浪《淮河》中篇当中唱格《新年锣鼓响连天》: [录音片段]

发表在 评弹知识讲座 | 标签为 , , , | 留下评论

(三) 长篇

现在评弹知识讲座,第三讲,长篇。由 廖望 供稿。评话搭仔弹词个传统书目啦,倘使每日天说一回,每回,也就是我伲讲起来每一场,唱一点三刻来算呢,比较长个。再加点穿唱,可以说到半年到八个月。我记得我搭我伲先生 沈俭安 勒浪城里向得意楼唱个辰光,年初一唱到八月半《珍珠塔》,唱得蛮长个。那么,短个呢,至少可以说两、三个月。一般来讲啦,评话个书目比仔弹词要来得长。实梗搭仔后来产生个中、短篇书相对比呢,更加称为长篇书目哉。传统书里向评话有《三国》、《水浒》、《岳传》、《英烈》等等;弹词呢,哦,弹词书多哉,有《三笑》、《白蛇传》、《描金凤》、《西厢记》、《玉蜻蜓》《杨乃武》,哦哟书还有交交关关勒嗨了,搿点侪是长篇书目。 所以评弹演员啦,勒浪农村、城镇书场演出,拿每一回书,一点三刻个书来算呢,分成两段。第一段,先说脱一个钟头左右,连下来休息。休息么,现在一般讲起来休息个十分钟,然后再上台,再继续说第二段。搿个当中个休息呢,我伲叫小乐怀。一回书说完仔呢,我伲叫大乐怀。所以长篇评话搭仔弹词啦,为仔要吸引听客,今朝倷听仔,明朝此地还要来听,要继续听下去。因为弗像中篇啦,中篇听仔么,今朝我听仔明朝好弗来听哉。长篇我要使得俚明朝、后日还要继续连下来听呢,要吸引更多个新听众。搿么纳哼呢,所以乐怀辰光板要拿后头个重点书目预先拎一拎,伲说书叫“拎一拎”,实在呢,就是预先宣布。那么,又要畀听众留下一个强烈个悬念。所以我伲演员啦,哦哟,搿个乐怀是重视得弗得了。乐怀本身啦,是一种艺术。因为乐怀乐得好弗好,影响明朝个生意个。但是乐怀个方式呢倒是蛮多个。下头我现在介绍几种乐怀。现在先介绍一种《玉蜻蜓》里向打 红云 个乐怀。 [录音片段]

发表在 评弹知识讲座 | 标签为 , | 留下评论

(二) 评弹的表演形式

评弹个基本演出啦,应该是以档为主。 对个。 所以我伲大家习惯去 :哟,今朝夜里去看场戏吧。弗叫看场书嘅。书呢,就要听一档书。听书听书,哎,听书啘。所以最早个评弹呢侪是一个人就叫单档。今朝已经弗多见哉。哦呦单档啦弗容易个阿。单档倷去想呢,伲书场里向有呒不布景有呒不灯光,又呒啥道具个。单档就是靠一张椅子一把扇子 ,啊是阿。有辰光呢,一只场子里有四五百个人,有辰光要八九百人得了。八九百人全神贯注听倷一倌子讲。搿个单档啦, 所以说应该是比较全面,单档角色要分得清,生旦净末丑,说噱弹唱演,要有比较全面个艺术修养。 对 。弗然就达弗到。弗然就听众就要听得厌气,要打嗑充,要坐弗牢个走啘啊是 。所以单档表演艺术力是很强个。现在我伲请老听众听一段严雪亭同志格单档演出杨乃武。 [录音片段] 那么由两个人同台演出个呢就叫是双档。拿三弦个呢是上手,一个人坐勒下手个呢就是拿琵琶个。两个人合作叫双档。书个结构起讫呢一般有上手掌握。我伲内行讲起来呢上手打多。所以勒浪角色扮演浪向阿,可以根据书情需要来进行分工。有仔实梗个分工呢,上下手之间互相配合。哦呦搿是使说唱个艺术更加生动哉。但是搿双档呢,一定要配合得好,要互相默契。对,顶要紧啘 。顶顶要紧紧凑。嗯。实梗一来两个人赛过一个人啦。嗯。人家听了欢喜听。对。外加艺术感染力强。是啘。所以往往搿双档啦,倒是弗是希望经常拆拆拼拼、拼拼拆拆,搿个双档拼弗好个。哎。只有几十年个老双档呢,哈,经常个磨练,实梗一来珠联璧合,相得益彰呢,搿个双档是听勒斜气有味道。相互默契。啊呀呀,使得说唱个艺术呢,更加个生动。现在请老听众听一段张鉴庭、张鉴国说个《花厅评理》,搿全就是男双档个演出。

发表在 评弹知识讲座 | 标签为 , , | 留下评论