(三) 长篇

现在评弹知识讲座,第三讲,长篇。由 廖望 供稿。评话搭仔弹词个传统书目啦,倘使每日天说一回,每回,也就是我伲讲起来每一场,唱一点三刻来算呢,比较长个。再加点穿唱,可以说到半年到八个月。我记得我搭我伲先生 沈俭安 勒浪城里向得意楼唱个辰光,年初一唱到八月半《珍珠塔》,唱得蛮长个。那么,短个呢,至少可以说两、三个月。一般来讲啦,评话个书目比仔弹词要来得长。实梗搭仔后来产生个中、短篇书相对比呢,更加称为长篇书目哉。传统书里向评话有《三国》、《水浒》、《岳传》、《英烈》等等;弹词呢,哦,弹词书多哉,有《三笑》、《白蛇传》、《描金凤》、《西厢记》、《玉蜻蜓》《杨乃武》,哦哟书还有交交关关勒嗨了,搿点侪是长篇书目。

所以评弹演员啦,勒浪农村、城镇书场演出,拿每一回书,一点三刻个书来算呢,分成两段。第一段,先说脱一个钟头左右,连下来休息。休息么,现在一般讲起来休息个十分钟,然后再上台,再继续说第二段。搿个当中个休息呢,我伲叫小乐怀。一回书说完仔呢,我伲叫大乐怀。所以长篇评话搭仔弹词啦,为仔要吸引听客,今朝倷听仔,明朝此地还要来听,要继续听下去。因为弗像中篇啦,中篇听仔么,今朝我听仔明朝好弗来听哉。长篇我要使得俚明朝、后日还要继续连下来听呢,要吸引更多个新听众。搿么纳哼呢,所以乐怀辰光板要拿后头个重点书目预先拎一拎,伲说书叫“拎一拎”,实在呢,就是预先宣布。那么,又要畀听众留下一个强烈个悬念。所以我伲演员啦,哦哟,搿个乐怀是重视得弗得了。乐怀本身啦,是一种艺术。因为乐怀乐得好弗好,影响明朝个生意个。但是乐怀个方式呢倒是蛮多个。下头我现在介绍几种乐怀。现在先介绍一种《玉蜻蜓》里向打 红云 个乐怀。

[录音片段]

【选段内容梗概:男角色打女角色(即前面说到的 红云 )一记耳光有400文的赏钱(选段中未提及),但他不认识 红云 。偏偏此时 红云 自己撞了上来,还自报家门。所以女演员旁白说:“小鬼丫头那么作死哉。” 男角色为了确认她的身份,避免打错人,还故意多问了几次, 红云 竟完全没有察觉。所以台下面的听众会爆笑】

现在再请唔笃听一段评弹个乐怀,哎,搭前头打红云个乐怀呢,又有点两样则。

[录音片段]

所以长篇里向对矛盾、戏剧矛盾个尖锐紧张个书目叫关子书。戏剧矛盾逐渐发展拿俚激化,我伲叫上关子。所以有个辰光我伲演员呢,有意弗透露矛盾解决个情况搭仔结局告诉唔笃,留个悬念,吸牢唔笃,让唔笃明朝板要来听。所以,以前呢蛮多个啦,阿呀有诸人有人请俚吃饭,俚情愿饭弗吃板要来听书。哦哟搿个关子非听不可,所以关子书啦重要得不得了,能够拉得牢人个。那么还有,搭关子书相比个呢,矛盾、冲突弗是很尖锐,也并弗哪哼大紧张,也弗哪哼大激烈。搿个书叫什么书呢?相对来讲就叫软当书。勒软当书叙述过场搭仔接榫个场化呢,称为弄堂书。哦哟,有辰光往往听见老听众讲:“哦哟,今朝搿回弗是关子书啘,是回弄堂书。”那搿个就叫弄堂书。当然,软当只是搭关子相对而言嘅。勒浪软当书里也有关子。而且,呒不软当书呢就呒不关子书。软当书呢也是为仔关子书铺白情节,组织矛盾,安排伏笔个。所以呢,艺术水平差个演员啦,往往碰着软当书,帮当一跳,统统跳光。哎,但是艺术水平高个演员里,俚很重视软当书。因为对于俚,哪哼来说好软当书,需要下一番苦工啊!要化很大个功夫,而使得软当书观众听下来弗软也是本事,要有弗少创造性。所以勒浪《三笑》书里向, 唐伯虎《追舟》一段实际浪是软当书呀。哎,但是经过演员个加工,追舟书里向呢,就刻画了人物性格,十分细腻,非常生动,妙趣横生。喏,像 刘天韵 说个《追舟》,勒浪山歌演唱浪向更加有特色,成为一回精品。所以听了浪呢,交关有味道。现在请听 刘天韵 搭 赵开生 演唱格《三笑 追舟》片段。

[录音片段]

所以,由此可见呢,软当书经过弗断个充实搭仔提高啦,可以转化为很好个书目个。我伲弗少优秀个传统书目,像《怒碰粮船》、《抛头自首》、《看龙船》、《捉鹦哥》侪是从软当书里整理出来嘅。所以长篇是评弹演出个基本形式。演员要说、噱、弹、唱、演,要练好搿基本功呢,长篇倒是基础,侪应该要说好长篇。该个是评弹知识讲座第三讲。

此条目发表在评弹知识讲座分类目录,贴了, 标签。将固定链接加入收藏夹。

发表评论