分类目录归档:黄埭人个故事

19 我记忆当中个中秋节

作者简介 “中秋”,也称为“仲秋”。大约勒浪二十四节气格“秋分”前后。也就是天文节令格“秋季”格中心时间。据说,每年格中秋节,也就是阴历(或称“农历”)格八月十五,是一年当中月亮最大,最圆格日脚。因此“中秋节”也就成仔中国人传统格“团圆节”。不过勒民间还有一种说法,叫做“十五格月亮十六圆”。当然,箇个“十五”、“十六”也侪是阴历格日脚。也就是说,阴历十六格月亮要比月半(十五)格月亮还要圆。 既然叫“中秋”为“节”,箇末应该是要过节嘅。所谓“过节”,也就是说一定有一种过中秋节格庆典仪式。非常遗憾格是我已经想勿起过中秋节庆典仪式格具体情形哉。我只隐隐约约记得,我小辰光有一年格中秋节,伲爹爹姆妈勒天井里摆仔一张八仙桌,台子朝南格一面系好仔红颜色格桌围,台子浪摆好仔香炉、蜡钎。台面浪除脱仔月饼之外也有几样荤素菜肴。等到垂夜快,开始点起香烛,进行祭祀。祭祀结束,方才可以吃夜饭。吃过仔夜饭以后,就是赏月。 中秋赏月是中秋节格一个重要节目。到阴历八月半箇日,吃过仔夜饭,家家屋里格大人侪会带仔自家格小干出来,到开阔格广场上、大园子里,或者桥面浪去看亦是大亦是圆格中秋明月从东面地平线浪慢慢交升起来,随着月亮渐渐升高,圆月也会得从大而慢慢交缩小,俚格颜色也会得从一开始升起辰光格黄里透红,到逐渐变成皎洁、雪白而耀眼。我记得,爹爹指牢仔月亮浪阴影,讲畁伲听,月亮里有称为“广寒宫”格“月宫”,还有住勒月宫里格嫦娥,有一只红眼白毛格玉兔一直陪勒俚身边,勒月宫里还有一棵开满木犀花格桂花树,有一个名叫“吴刚”格人一直守勒桂花树格旁边看牢树浪箇些木犀花,俚有辰光会采仔木犀花做桂花酒。还会拿“嫦娥奔月”格神话故事讲畁伲听。

发表在 黄埭人个故事 | 标签为 , | 留下评论

18 我有个好兄弟

作者简介 我格兄弟出生于一九四八年一月三十一日,农历腊月(十二月)廿一。因为从干支纪年朗推算,仍旧勒丁亥年里向,所以俚格生肖浪仍旧属猪。从生肖属相浪,俚比我小六岁。但是从俚个出生日期浪推算,俚格年纪实际浪要比我(出生于一九四一年七月十一日)小脱六岁半。 我箇位兄弟出生格辰光,通体雪白几乎呒不一点瑕疵,所以,伲侪叫俚“白白”。从此,“白白”也就成仔俚格小名。我箇个兄弟勿单是皮肤白,而且还晒勿黑。俚身浪格皮肤,勿管是夏天头里游水,还是赤仔膊勒太阳头里晒,皮肤只会红,哪怕是晒得脱皮,俚格身浪也勿会变黑嘅。尽管俚现在已经年过花甲,身浪格皮肤也呒不小辰光实梗白,但是“晒勿黑”格皮肤却功能依旧。箇个一个特殊功能已经遗传畀仔俚格儿子! 按照迷信格说法,白白格命宫相当退班:倷想嚷,俚格生肖属猪,出生格日脚亦是即将过年格“腊月廿一”,也就是说箇只“猪”是要畀人杀仔吃肉格“年猪”。而且伲姆妈生俚箇辰光,伲爹爹畀军统抓得去仔勒浪南京吃官司,虽然伲姆妈已经变卖屋里格物事托仔人到南京去疏通,救伲爹爹出来,但是结果哪亨?仍旧生死前途未卜。伲姆妈日日以泪洗面,默默祈求菩萨、祖宗冥冥之中保佑爹爹能够早点平安回转屋里!

发表在 黄埭人个故事 | 标签为 , | 留下评论

17 我记忆当中个“巧日”

作者简介 我记得,我小个辰光,大人笃拿农历七月初七称做“巧日”。还听伲爹爹姆妈告诉我,每年阴历个七月初七,是传说当中畀王母娘娘拆散个一对恩爱夫妻——牛郎、织女,通过“鹊桥”相会个日脚。而且说:每到箇个一日,天浪就看弗见有喜鹊飞个身影,也听弗见喜鹊个叫声。说是因为勒箇个一日,天下所有个喜鹊侪飞到天浪箇条银河浪向去搭桥去哉,搭好仔鹊桥让牛郎、织女勒鹊桥浪相会。现在也有人拿农历七月初七箇日称为中国个“情人节”。 每年个阴历七月初七,侪勒浪立过仔秋以后,但是仍旧还勒浪还朆开学个暑假里向,箇个辰光两三场秋雨之后,盛夏个暑热已经有所收敛,然而凉气还朆降临,清澄而蔚蓝色个天际,漂浮着洁白个云朵,正是一派秋高气爽个景象。 “乞巧”,就是勒实梗一种天气个“巧日”里盛行于民间个一项传统个民俗民风活动。不过,勒我个记忆当中,箇项民俗活动个主角主要是女性,尤其是未成年女性和女小人。当然也会有看热闹个男人搭仔欢喜凑热闹个男小倌参与。到仔阴历七月初七箇日个中浪向(中午时分),掇一只方凳或者小台子到太阳头里,勒凳子或者台子当中放一只盛有大半碗“阴阳水”个碗,所谓“阴阳水”,就是说箇只碗里向个水是用一半河水搭一半井水镶起来个水。

发表在 黄埭人个故事 | 标签为 , | 留下评论

16 我小辰光个端午节

作者简介 再过两日天,就是端午日。小辰光,长到开始记事个辰光,爹爹、姆妈就会得讲畁伲听,端午节是纪念战国时代个爱国诗人,楚大夫屈原勒农历五月初五搿日投汨罗江殉国个日脚。到后首来,到学堂读仔书,历史先生也讲着仔搿桩令人肃然起敬个悲壮历史事件。 我个人大约三、四岁个辰光就开始会得记事哉。现在回想起来,搿辰光个事体还能够依稀想得出来。因为我是生勒战乱年代(1941年,当时称民国三十年)个沦陷区。普通百姓勒搿种兵荒马乱,人人自危个日脚里向,哪里还有啥个心思去过啥个节。所以,直到仔我六岁,也就是1946年(当时称民国三十五年)个辰光方始晓得过脱仔新年之后,还有个端午节!也是我记忆当中过个最隆重个端午节。 现在回想起来, 我记得,搿年伲刚刚吃脱伲姆妈为立夏日做个甜酒酿,端午节就到哉。一早起来,姆妈拿出一身新做个印仔勿勿少少小黑老虎个明黄色短衫裤,搭我着勒身上。远远叫看上去就像勒我身上披仔长老虎皮一样。搭我勒脚上先套一双白颜色个新袜,再着仔一双新个,头上用五彩丝线绣好仔虎头样子个黄布鞋。等到姆妈拿一顶虎头帽望我头上一戴,我自家马上就觉着,我就是一只威风凛凛个小老虎!我马上跑到房间里。望大厨门面上长椭圆形个穿衣镜门前一立,自我欣赏起自家搿只小老虎个神气样子来。

发表在 黄埭人个故事 | 标签为 , | 留下评论

15 说说乡下头个牛车棚

作者简介 牛车棚也算是伲苏州乡下头个一道特色景观,倷现在再到苏州乡下头去,恐怕已经难以寻觅。勒我童年个记忆里向,牛车棚也是伲经常光顾白相个场化。 勒伲苏州乡下,河浜密布,纵横交错。水稻个种植也算是伲苏州乡下农民个主产作物。一到田里个冬小麦、油菜收割登场,种稻个水田就要车水泡田。箇辰光,只要到伲苏州乡下头来,就能看得见野田爿里个一只只牛车棚,从早浪到黄昏头老牛车水个忙碌景象哉:一只戴上眼罩个水牛套上架,牵动牛车盘勒牛车棚里兜圈子。转动个牛车盘弗停发出个“盎里里,盎里里”个响声,老牛时弗时个“哞哞”鸣叫声,听起来个味道就像是老牛搭牛车勒浪对唱山歌一样,相当悦耳,十分动听。牛车盘周边个齿带动地轴个转动,连勒地轴另外一端个是一部车水个水龙,一头伸勒河浜里,一头搭勒水沟浪,随着牛车个转动,河浜里清澈个河水源源弗断个畀水龙车浪个戽水板提上来,“哗啦啦”个流进灌溉稻田个水沟。一个头戴箬帽,一手挡牢仔嘴浪个旱烟管,一手拿好仔一把平头起土铲个农民,一面喷云吐雾,一面沿水沟巡视,看看水沟两边一丘丘田里向水个深浅,要拿水够深箇丘田头个缺口用铲挖泥土填塞起来,还要搭还朆放水箇丘田个田头开口放水。老牛也弗能一径让俚弗停个勒牛车棚里转圈车水,做两个钟头生活下来,也要拿牛解(苏州白话读作 [ga 价 ] )下来,让箇只牛休息休息,喂(苏州白话读作 [yu 淤 ] )俚吃吃草。假使天气忒热,还要拿箇只牛牵到河浜里,让俚勒河浜里淴(苏州白话读作 [hue 忽 ] ,沐)脱个浴。

发表在 黄埭人个故事 | 标签为 , | 留下评论

14 听书

作者简介 伲黄埭镇,过去辰光虽说只是一个人口弗过一万,小街仅有三里个小码头。我旧年勒《中国评弹网》浪看见一只关于《举办黄埭书场创办一百周年庆典》个帖子。帖子郎介绍黄埭书场勒浪苏州评弹界心目当中个地位个搭重要性个辰光说,黄埭勒苏州评弹界来说,却是俚厾出道进大上海之前,一个必须要前来经受黄埭听客考验个重要码头!看仔实梗个介绍。现在想起来,为啥后来箇点勒上海滩个书坛浪名震四方,名气响得“刮啦啦”个响档,像说小书(弹词)个徐云志、严雪亭、蒋月泉、张鉴庭张鉴国、杨振雄杨振言、朱雪琴、徐丽仙,还有说大书(评话)个唐耿良、曹汉昌等等,我小辰光能够勒黄埭个书场里向侪看见过俚厾勒书坛浪表演个风采哉。至于江苏搭仔苏州个评弹名家,可以说呒不哪一个朆到黄埭来说过书。现在看来,作为一个黄埭人,还真个觉着有点自豪个感觉嘞。 对于帖子浪说个“黄埭书场”,我脑子里始终想弗起来是啥个样子。我只记得,我小个辰光,全黄埭搭戏、曲有关个文化娱乐场所只有三搭场化,两搭是唱戏嘅:东横头闹市区一搭,名叫“大雅”个戏馆,京戏、绍兴戏(越剧)、上海滩簧(沪剧)、文明戏(话剧)、滑稽侪勒箇爿戏馆里登台演出过;一搭是弗晓得名字嘅,勒中市桥下塘个一爿堂口并弗大个茶馆,主要是提供畀小戏班(草台班)唱戏,像无锡摊簧、江北戏(扬剧、淮剧);说书个只有一爿,离伲屋里最近,勒河渎桥西堍浪个,名叫“东来”个书场。

发表在 黄埭人个故事 | 标签为 , , | 留下评论