有一日，勒路浪碰着曾经做过三十几年乡邻个江苏省中医院个退休护士长小杨阿姨，长远弗见，一见面，俚用常州普通话对我说： “本忠啊，你的样子越来越像你的爸爸了。 ”我就问俚：“哪亨见得？”
“你爸爸的两条眉毛在省中医院门诊上是出了名嘅啘！几化病人侪要来寻箇位长眉毛个老医生看病。一直到你爸爸去世以后也还有人慕名前来寻俚看病呢！”俚说，“你看你个两条眉毛，也是长得那么长，啊像你爸爸的一样！”
儿子搭爷勒模样上长得相像，其实是十分正常个事体，本来呒啥稀奇。其实我年轻辰光个样子更加向伲姆妈，伲姆妈个人，身体长得小迹灵灵嘅；我个身材也是瘦瘦小小，身高刚好只有一米六。伲姆妈个面孔是瓜子脸个脸型，两条淡淡眉毛；我也是一副瓜子脸个脸型，年轻个辰光我个两条眉毛也弗浓，也呒不像现在实梗个长眉毛。勒黄埭，勒苏州个乡邻，侪讲我个样子像伲娘。
不过，我细细佼想想，我搭伲爷的确还有其他方面相像箇个场化。譬如出世辰光搭仔自家爷个年纪相差浪是相同嘅。我听爹爹说过，伲阿爹勒六十八岁浪过世嘅，箇辰光伲爹爹个年纪是廿九岁，俚笃两家头格年纪相差三十九岁；爹爹出世个年份是勒清朝光绪廿八年，也就是公元一九零二年，我出世个辰光是民国三十年，也就是公元一九四一年，我搭伲爹爹个年纪也相差三十九岁！
爹爹是一九七四年过世嘅，按习惯用虚年龄计岁，箇年伲爹爹就是七十三岁，比阿爹多活五岁年纪，我现在预言自家也会比伲爹爹多活五岁年纪，我预计我自家可能会勒二零一八年离开人世！
其实，箇点点相像侪弗值得当桩事体来写嘅。勒我脑子里一经挥之弗去个是我让伲爹爹生前对我感到彻底失望个事体：朆能够按俚老人（该搭个 “ 人 ” ，苏州话里读如 [niang 娘 ] ）家个意思去跟俚学习中医，继承俚个衣钵。现在想起来真个觉着有点愧对俚老人家嘅。
现在，再回想起爹爹生前对我个所做、所言，侪隐含着要我跟俚学中医，继承俚衣钵个意思。
箇还是勒上一个世纪 60 年代之初，由于人祸搭仔天灾，我就读格一爿技术学堂因实行当时个“调整、巩固、充实、提高”个“ 八字方针”而解散停办。一纸“证明”让我回家待业。待业箇辰光，也因为爹爹搭南京中医学院（现更名为 “ 南京中医药大学 ” ）之间个关系，我有一段辰光就勒南京中医学院《中药大辞典》编写组里做抄写文稿个临时工作。因此我也同时接触过不少有关中医中药理论方面个文献资料。实梗个条件，对我来说，就是学习中医学知识，将来成为一名中医师极为有利个机会。加上我本身从小就体质虚弱而且多病，医生箇个以脑力劳动为主个职业应该比较适合我个身体条件。呒不工作待业勒屋里，正好有充足个学习辰光。爹爹业为了提高我对中医事业个兴趣，勒那段辰光里，差弗多每日天侪要拿俚勒医院门诊浪碰着个疑难病例、俚对病症个处理方法，搭仔经过俚治疗以后个效果，像讲故事一样讲畀我听。我也弗是木头，当然晓得爹爹个苦口婆心。但别过，箇辰光弗像现在实梗开放。一个人勒搿个时代个想法是，侪只想有一个国有个工作单位，一个固定个工作岗位，一份稳定个工资收入。就是实梗一种带有时代烙印个思想，让我完全放弃了继承父业个机会。