勒我小个辰光，哪里像现在实梗，家家户户侪装仔冷暖空调，热天开冷气，冷天开暖气，人登勒屋里，热天热弗着，冷天冷弗着。搿辰光，勒黄埭箇种小场化，赅（苏州白话读作 [kai 该 ] ，拥有 ）电风扇个人家相当少，简直可以用“屈指可数”来形容。屋里就是赅仔电风扇，也舍弗得一日开到夜，让俚弗停吹嘅。所以箇个辰光，一到夏天，家家人家个大人、小囡，吃过仔夜饭侪会带仔扇子、矮凳到桥面浪，或者空旷个场化去吹风凉。伲屋里也一样，吹风凉个场化就是笡（苏州白话读作 [tshia] ，斜 ）对面个芳桥面浪。
当然，到桥面浪吹风凉个还有弗少乡邻：东隔壁个擅长搭小倌儿推筋个阿二倌笃、西隔壁席行个王家里、对过洋袜摊个王老板笃、西面六房墙门口镶牙子个程先生搭仔俚个两个儿子，大坤、小坤。还有芳桥下塘桥堍浪个几家人家个小倌。最受伲搿辈小囡欢迎个，也就是箇位程先生！原因就是俚讲个故事特别吸引伲箇辈小倌。俚讲“三国志”、“水浒传”、“封神榜”里个故事畀伲听。俚最拿手个，是讲“鬼（苏州白话读作 [tcu 句 ] ）”个故事。
程先生讲故事个辰光，对听俚讲故事个人是有要求嘅。俚要求听故事个人要围牢佼仔俚；两只眼睛也要盯牢佼仔俚；弗许人追问；弗许打断俚个闲话。程先生讲起“鬼”故事来，绘声绘色，声音也是抑扬顿挫，每一个听俚故事个人弗由得弗跟仔俚故事情节个延伸而精神紧张、眼睛结出弗敢旁顾、浑身汗毛竖起。有辰光，讲到关键时刻，俚也会问大家：“恁笃啊怕？怕末我就讲到该搭。”箇晨光，伲箇辈小倌难就会异口同声回答：“弗怕！”不过回答个声音明显就是强装出来嘅。为仔听俚个“鬼”故事，每每弄到深更半夜方才或唱歌，或吹口哨来壮仔自家个胆子回转屋里去。一只搭苏州养育巷有关个贼骨头想到有铜钿人家去偷物事碰着“鬼”个故事，我至今记忆犹新。
我弗晓得看我该只故事个朋友，倷小辰光啊曾白相过扮“鬼”个游戏？假使倷朆白相过，箇末，让我来告诉畀倷听。
勒黑黜黜个环境里，倷对好仔镜子，拿只电筒，放勒下巴底下，让电筒光从下朝上照，倷啊想得出倷镜子里只面孔会是啥个样子？假使倷再拿条舌头伸出来，拿面孔浪个肌肉再往下拉一拉，倷箇只面孔就是活脱脱个传说当中个“鬼”面孔！镜子里箇只面孔让倷觉着更加恐怖。箇种扮“鬼面孔”个方法，我也是勒浪白相“官兵捉强盗”游戏个辰光，从比我大个淘伴搭学得来嘅。
学会仔扮“鬼”面孔之后，也会得拿仔电筒学畀自家个弟弟、妹妹看，还教俚笃也来扮“鬼”面孔。有辰光还会得搭仔几个淘伴一淘，吃过仔夜饭，拿仔只电筒，扮仔“鬼”个面孔，勒黄埭街浪，从上塘到下塘，从东横头到西横头，满街个跑来跑去。有辰光也会取吓吓比自家小个小倌儿或女小娘。吓得小倌哇哇哭。也有辰光会畀别人捉牢仔拖倒爷娘搭去“告状”。箇辰光，爷娘会代替自家搭别人家赔弗是，自家也难免遭到爷娘个一顿训斥。
倷啊曾听见过“鬼”叫？
记得是一个新学年刚开始弗久，吃过仔夜饭，跟仔爹爹勒厅浪踱仔歇方步，稍微活动活动之后，我就拿当日学堂里先生布置功课拿出来做。爹爹就勒旁边陪我。我小辰光，算术个学习成绩是非常退扳嘅。所以功课里向只要一有算数，我个功课做起来也就特别慢。几个算术个应用题，足足拉腊做仔两个多钟头。爹爹也耐足性子勒旁边陪我，停停走到我背后头来看看我，歇歇走到我身边来望望我，然后再一个人勒厅里踱步。因为爹爹讲过，做功课一定要靠自家动脑筋，教出来个功课，到下转碰着，仍旧弗会做，反而害仔俚。所以爹爹勒旁边陪我，我决计弗敢去问俚，只好一个人苦苦思索，直到想出来为止。实梗一来二去，弗知弗觉之间，辰光已经到仔深夜十点多钟。
就勒箇辰光，老远隐隐约约传来几声“嘘嘘”，“哈哈”个声音。听见箇个声音，爹爹个脚步忽然停仔下来，原地立停，听仔一歇，亦传来几声“嘘嘘”，“哈哈”个声音。爹爹个弗逊场举动，也引起仔我个注意，而且箇个声音也听得清清爽爽，我带着疑问个神情对爹爹望。
只听见爹爹说：“刚刚个声音倷啊曾听见？”我点点头。
爹爹说：“倷啊晓得箇是啥个声音？”我摇摇头，说：“弗晓的。”
爹爹忽然神秘兮兮个，压低仔声音对我说：“箇个就是鬼叫个声音！”俚实梗一说，我只觉着一股凉气勒我背心浪升起，身浪汗毛也竖仔起来哉，我马上立起身来，盼到爹爹跟前，拿俚个身体抱得铁紧，我说闲话个声音也变脱哉，身体也抖抖索索。
爹爹晓得我心里极度恐惧。俚摸牢交仔我个头，说：“我闲话也朆讲完呢，倷就吓得实梗则啊，倷个胆哪亨能个小吤！倷覅吓，箇种声音其实呒啥吓头。世界浪哪 （ 苏州白话读作 [lo 咯 ] ） 搭有啥个‘鬼’呢。我刚刚说个‘鬼’叫，其实根本弗是啥个‘鬼’叫，是一种鸟 （ 苏州白话读作 [tiao 雕去声 ] ） 个叫声。箇种鸟最欢喜夜里勒亮月底下一面飞一面叫，叫个声音末阴落落个，咋生头里听见，人家侪当是鬼叫嘅。”说完，亦勒我头浪摩摩。
爹爹个一番解释之后，我弗吓哉。重新回到台子旁边，拿最后一个题目个最后两个字写完，然后跟爹爹一淘到楼上去睏觉。