箇也是我勒浪黄埭个辰光发生个一桩我记忆犹新个事体。我是一九五二年随全家移居到苏州市里向嘅，所以箇桩事体大约发生勒一九五零年前后个初夏。
事体要从姆妈做豆瓣酱说起。我小辰光，伲屋里向吃个酱侪是姆妈自家做嘅。每年到蚕豆要落市个辰光，姆妈就会买弗少个老蚕豆，拿俚剥出豆瓣来用水煮熟，焖烂，加面粉一淘拌匀，做成小方块个酱黄糕，让俚发霉，放到敞口个陶缸里向，再加盐搭仔酱油，还要适当个加冷开水。勒空旷个地方放一只木头个三脚架，酱缸就架到三脚架浪。日里让太阳底下暴晒，垂夜块，要勒酱缸浪罩一只圆锥形状个白铁皮做个酱棚盖，隔开露水，防止雨水。为仔要避免苍蝇叮，要勒酱缸朗加一个透气个罩。箇个罩，现在大家侪会用消毒纱布、金属纱网，或者塑料纱网做一个比缸口大个罩，盖勒酱缸浪挡虫挡灰尘。
老早，勒我小辰光，曾经看见有个人家是用一只比酱缸口径稍微大一点个圆竹框做嘅，为仔竹框盖得着实，当中再加扎一个“十”字撑，然后勒箇只竹框浪卷满结蛛罗网。实梗个盖既能够透过太阳光，也可以透气，还便于水分蒸发，而且随便啥个虫也侪钻弗进去。其实伲小个辰光还用卷满结蛛罗网个竹框框，绑勒长竹头浪仔，去捉树浪向个知了（苏州人称会鸣叫的“蝉”为“知了”）。
为仔要弄实梗一只盖，我自告奋勇，瞒脱仔屋里向个人，一干子拿仔只做好个竹筐绑到一根一人多长个竹头浪，去卷结蛛罗网。我走遍屋檐、墙角树丛，一张张大大小小个结蛛罗网畀我一一卷到我个竹筐浪，竹筐浪已经卷满仔结蛛罗网。哪里晓得我勒浪卷最后个一张结蛛罗网个辰光，只顾仔上头，朆顾着脚底下。啥人晓得一脚踏添，滑进仔旁边个粪缸里，粪缸里个屎一直没到我个脚踝（苏州白话读作 [ku 箍 ] ）骨。我马上厾脱手里箇根柱头，两只手勒坑缸边浪一撑豁出坑缸。箇根卷结蛛罗网个 竹 头总算幸亏（苏州白话读作 [chyu 区 ] ）厾得快，竹头戗勒旁边个墙头浪 向 ，朆弄着坑缸里个龌龊，我一下昼个努力总算呒不白费。于是，我马上掮仔箇根竹头到河滩头，拿竹头望旁边 个 树桠子浪一戤，拿两只脚浪个鞋、袜统统脱下来，赤仔脚立到河里，仔仔细细个拿鞋袜浪、脚浪个屎迹汏干净。为仔瞒脱屋里个爹爹姆妈，勒外头一直等到拿鞋袜 {日良} （ 苏州白话读作 [ laon 朗 ] ，晾 ） 干仔以后，方始回到屋里。
虽然鞋、袜搭脚浪个龌龊，我已经勒小河浜个河滩浪仔细个汏过，朆留一点点痕迹，但是勒坑缸边浪擦过个短衫裤子浪残留个气味，终于朆骗过屋里向大人灵敏个鼻头。畀大人一阵诘问，只好拿自家个遭遇个经过一五一十 ，原原本本 ，侪讲出来。
“倷箇个死小鬼（苏州白话读作 [tcyu 举 ] ），倷算伽（苏州白话读作 [dzia 迦 ] ，逞能；精明，能干之意。因未知正字为何字，此处仅以其同音而借用之）嘅！”姆妈说，“倷勒外头出仔事体，屋里向也呒不人晓得！我哪亨搭恁厾爷去讲吤？箇种龌里龌龊个物事哪亨去盖勒酱缸浪向呐。哪亨畀倷想出来嘅！下转弗许倷一个人再去做箇种危险个事体！”说完就拿我辛辛苦苦弄得来个箇只竹框框拗断仔甩 [huei挥] 勒天井角落头个垃圾（苏州白话读作 [le 肋 se 色 ]）堆浪。虽然我当时辰光嘴浪弗说，心里向是蛮弗服帖嘅。只是伲小辰光个规矩，勒大人面前是弗许回嘴百答嘅。不，事体过仔之后 ， 自家再仔细回想想当时发生个事体，自家也觉着蛮险嘅，大人个教训真是说得一点也弗错：一人多深个坑缸，假使坑缸里向个屎已经存满，滑下去辰光一脱手朆撑牢缸边，旁边亦呒不人帮忙，当时我可能就已经沉杀勒坑缸理想，也就呒不我个今朝哉！