牛车棚也算是伲苏州乡下头个一道特色景观，倷现在再到苏州乡下头去，恐怕已经难以寻觅。勒我童年个记忆里向，牛车棚也是伲经常光顾白相个场化。
勒伲苏州乡下，河浜密布，纵横交错。水稻个种植也算是伲苏州乡下农民个主产作物。一到田里个冬小麦、油菜收割登场，种稻个水田就要车水泡田。箇辰光，只要到伲苏州乡下头来，就能看得见野田爿里个一只只牛车棚，从早浪到黄昏头老牛车水个忙碌景象哉：一只戴上眼罩个水牛套上架，牵动牛车盘勒牛车棚里兜圈子。转动个牛车盘弗停发出个“盎里里，盎里里”个响声，老牛时弗时个“哞哞”鸣叫声，听起来个味道就像是老牛搭牛车勒浪对唱山歌一样，相当悦耳，十分动听。牛车盘周边个齿带动地轴个转动，连勒地轴另外一端个是一部车水个水龙，一头伸勒河浜里，一头搭勒水沟浪，随着牛车个转动，河浜里清澈个河水源源弗断个畀水龙车浪个戽水板提上来，“哗啦啦”个流进灌溉稻田个水沟。一个头戴箬帽，一手挡牢仔嘴浪个旱烟管，一手拿好仔一把平头起土铲个农民，一面喷云吐雾，一面沿水沟巡视，看看水沟两边一丘丘田里向水个深浅，要拿水够深箇丘田头个缺口用铲挖泥土填塞起来，还要搭还朆放水箇丘田个田头开口放水。老牛也弗能一径让俚弗停个勒牛车棚里转圈车水，做两个钟头生活下来，也要拿牛解（苏州白话读作 [ga 价 ] ）下来，让箇只牛休息休息，喂（苏州白话读作 [yu 淤 ] ）俚吃吃草。假使天气忒热，还要拿箇只牛牵到河浜里，让俚勒河浜里淴（苏州白话读作 [hue 忽 ] ，沐）脱个浴。
勒箇段辰光里，我会得勒下晚昼放仔夜学，揹仔书包，兜到附近各乡下头去，坐勒牛车棚边浪，一面看老牛车水，一面做功课。做好仔功课，或者勒水沟里淘水白相，或者勒礼拜日，结仔淘伴，一淘到附近的乡下头去，一面看老牛拉牛车盘车水，一面白相，或者听管水车个老伯伯说山海经讲故事。有辰光也会得偷偷摸摸，手抓紧仔牛车盘浪个斜杠，或坐，或立，登到转动个牛车盘浪，享受趁牛车兜圈子个乐趣。箇种举动，一是有危险，二则会增加老牛拉牛车盘个力量，所以管车人看见，就会畀俚赶下来。
建勒小河浜岸边浪个牛车棚，看上去搭得像只亭子一样：四根一人多高个花岗石石柱浪，架一个或圆或方个尖顶棚棚，棚顶浪是层层柴草铺设得蛮蛮厚个，太阳也晒弗透个顶棚屋面。周围还种几棵绿莹莹，高高大大个垂丝杨柳。牛车棚里个车盘虽然侪是用木头做成功嘅，但并弗是每日天侪要用牛来车水嘅，因为牛车盘十分笨重，装好以后，也弗会经常装装拆拆，一般弗到秋天晏稻收割登场，田里弗需要大规模用水嘅辰光是弗会拆嘅。
骄阳似火个盛夏，登勒箇种乡下头个牛车棚里，感觉吹进来个风特别凉爽。所以也是伲夏天头经常想要去白相个场化。每逢礼拜日，或者带仔兄弟姊妹，或者搭白相淘伴结仔淘，吃过仔中饭，赤仔脚一淘奔跑勒晒得滚烫个田岸头浪，一直奔到乡下头个牛车棚里，然后抢占牛车盘浪个位置。因为一只车盘一般只有四根斜杠，每根斜杠旁边坐两个人，最多只能坐八个人。勒车盘浪坐好之后，手抓牢车盘浪个斜杠，然后用一只脚勒地郎一踮一踮，使车盘转起来。车盘一转，风吹到身浪，感觉更加凉爽。假使车盘转得过分快，坐勒浪个人有辰光会有头昏个感觉。一淘来白相的人多个辰光，大家就轮流白相。就像现在儿童乐园里个箇种电动转盘一样。