“头”字可以认为是苏州话的一大特色字。
“倷个人讲闲话囊只看自家鼻头弗钆别人苗头个啦。搿老话说煞弗错，做事体钆苗头，听闲话听音头，小菜吃鲜头，吃面吃浇头，衣裳着领头，裤子着缝头，皮鞋着光头，麻将糊杠头，听书要听噱头呀，啊对。” [选自评弹《大脚皇后》之讽脚（一）施斌吴静张丽华演出版]
1. 基本字：【头】[deu223]
2. 在普通话中也常用的词：【木头】[moh23-deu31]【骨头】[kueh43-deu23] 【枕头】[tsen51-deu23]【来头】[le22-deu33]【丫头】[o44-deu31]
3. 【榔头】[laon22-deu33]锤子。【掼榔头】[gue231 laon22-deu33] 继续阅读
牛车棚也算是伲苏州乡下头个一道特色景观，倷现在再到苏州乡下头去，恐怕已经难以寻觅。勒我童年个记忆里向，牛车棚也是伲经常光顾白相个场化。
勒伲苏州乡下，河浜密布，纵横交错。水稻个种植也算是伲苏州乡下农民个主产作物。一到田里个冬小麦、油菜收割登场，种稻个水田就要车水泡田。箇辰光，只要到伲苏州乡下头来，就能看得见野田爿里个一只只牛车棚，从早浪到黄昏头老牛车水个忙碌景象哉：一只戴上眼罩个水牛套上架，牵动牛车盘勒牛车棚里兜圈子。转动个牛车盘弗停发出个“盎里里，盎里里”个响声，老牛时弗时个“哞哞”鸣叫声，听起来个味道就像是老牛搭牛车勒浪对唱山歌一样，相当悦耳，十分动听。牛车盘周边个齿带动地轴个转动，连勒地轴另外一端个是一部车水个水龙，一头伸勒河浜里，一头搭勒水沟浪，随着牛车个转动，河浜里清澈个河水源源弗断个畀水龙车浪个戽水板提上来，“哗啦啦”个流进灌溉稻田个水沟。一个头戴箬帽，一手挡牢仔嘴浪个旱烟管，一手拿好仔一把平头起土铲个农民，一面喷云吐雾，一面沿水沟巡视，看看水沟两边一丘丘田里向水个深浅，要拿水够深箇丘田头个缺口用铲挖泥土填塞起来，还要搭还朆放水箇丘田个田头开口放水。老牛也弗能一径让俚弗停个勒牛车棚里转圈车水，做两个钟头生活下来，也要拿牛解（苏州白话读作 [ga 价 ] ）下来，让箇只牛休息休息，喂（苏州白话读作 [yu 淤 ] ）俚吃吃草。假使天气忒热，还要拿箇只牛牵到河浜里，让俚勒河浜里淴（苏州白话读作 [hue 忽 ] ，沐）脱个浴。
伲黄埭镇，过去辰光虽说只是一个人口弗过一万，小街仅有三里个小码头。我旧年勒《中国评弹网》浪看见一只关于《举办黄埭书场创办一百周年庆典》个帖子。帖子郎介绍黄埭书场勒浪苏州评弹界心目当中个地位个搭重要性个辰光说，黄埭勒苏州评弹界来说，却是俚厾出道进大上海之前，一个必须要前来经受黄埭听客考验个重要码头！看仔实梗个介绍。现在想起来，为啥后来箇点勒上海滩个书坛浪名震四方，名气响得“刮啦啦”个响档，像说小书（弹词）个徐云志、严雪亭、蒋月泉、张鉴庭张鉴国、杨振雄杨振言、朱雪琴、徐丽仙，还有说大书（评话）个唐耿良、曹汉昌等等，我小辰光能够勒黄埭个书场里向侪看见过俚厾勒书坛浪表演个风采哉。至于江苏搭仔苏州个评弹名家，可以说呒不哪一个朆到黄埭来说过书。现在看来，作为一个黄埭人，还真个觉着有点自豪个感觉嘞。
对于帖子浪说个“黄埭书场”，我脑子里始终想弗起来是啥个样子。我只记得，我小个辰光，全黄埭搭戏、曲有关个文化娱乐场所只有三搭场化，两搭是唱戏嘅：东横头闹市区一搭，名叫“大雅”个戏馆，京戏、绍兴戏（越剧）、上海滩簧（沪剧）、文明戏（话剧）、滑稽侪勒箇爿戏馆里登台演出过；一搭是弗晓得名字嘅，勒中市桥下塘个一爿堂口并弗大个茶馆，主要是提供畀小戏班（草台班）唱戏，像无锡摊簧、江北戏（扬剧、淮剧）；说书个只有一爿，离伲屋里最近，勒河渎桥西堍浪个，名叫“东来”个书场。
绿豆汤，可以说是一种人人晓得个，勒夏天头里，人人侪欢喜，大家常吃个清凉败毒、消暑解渴饮品。一般个绿豆汤就只是用淘干净个绿豆加水烧煮个豆少水多，吃个辰光再加白糖，或者勒烧个辰光就直接加仔糖一淘烧。绿豆汤里还可以加点百合 （ 苏州白话读作 [an 按 ] ） ，就叫做“百合绿豆汤”。不过百合是生勒烂泥地里嘅，勒蒂里挖出来会带弗少烂泥。要放勒镬子里搭绿豆一 淘 烧之前，一定要一瓣一瓣剥下来，掐脱百合个尖，撕脱表面个一层衣，勒水里向汏（苏州白话读作 [da 大 ] ，洗 ） 干净，否则烧好个绿豆汤吃起来苦味比较重。
旧年夏天，我勒无锡碰着仔伲勒上海个大阿姐，搭俚讲起仔小辰光吃绿豆汤个桩事体。大阿姐告诉我，卖绿豆汤个人，也弗记得俚姓啥叫啥，不过大家侪晓得俚个绰号叫“牛屄阿荣”。
毛豆荚（苏州白话读作 [tce 吉 ] ）干、笋豆、盐金豆，是伲小辰光屋里弗断个自备零碎食。每日天下晚昼（苏州白话读作 [gho 夏 mai 蛮 tsou 州 ] ，下午），学堂里放仔夜学，回到屋里姆妈看见仔伲，第一句就会问：“肚皮啊饿？”然后就勒专门放零碎食个果子桶里抓一把毛豆荚干，传畀伲。让伲一面做功课，一面吃毛豆荚干。有转把，伲也会主动提出来：“姆妈，毛豆荚干啊有嘞呀？”只要听见姆妈肯定个答复，就会自家用小手到果子桶里搲两把毛豆荚干，塞勒自家个衣裳袋袋里，慢慢交剥来吃。
我小辰光，伲屋里每年到入秋，乡下个毛豆田侪要拔毛豆箕，改种别个物事个时节，也就是到毛豆要下市个时节，因为箇辰光个毛豆价钿已经跌到仔最低。伲姆妈就会到街浪拿乡下人卖个毛豆一担一担个买转来。然后叫人拣一拣，留下豆粒饱满个毛豆荚，到河滩浪汏干净，稍微沥沥干水，倒进大镬子里用水加盐烧熟。用笊篱那烧熟个毛豆荚从镬子里撩出来，勒大个 匾 里摊开，放到屋面浪向，勒太阳头里晒干。伲屋里每年晒个毛豆荚干，差弗多箇种三尺头个大 匾 ，足足要摊满两大 匾 。等到毛豆荚晒干个辰光，两 匾 就剩一 匾 哉。箇个一 匾 收 转来，大个果子桶揿揿实质放满仔一桶还多，多出来个再放勒一只小一点个果子桶里。小桶里个就是畀伲勒平时辰光拿来吃嘅。小桶里吃脱仔，姆妈会拿大桶里个毛豆荚干放点到小桶里。姆妈始终弗会让伲自家到大桶里向去搲毛豆荚干吃嘅，实梗一来，大桶里个毛豆荚干大部分就能够留到过年辰光作为新年礼物拿出来畀伲吃。
箇也是我勒浪黄埭个辰光发生个一桩我记忆犹新个事体。我是一九五二年随全家移居到苏州市里向嘅，所以箇桩事体大约发生勒一九五零年前后个初夏。
事体要从姆妈做豆瓣酱说起。我小辰光，伲屋里向吃个酱侪是姆妈自家做嘅。每年到蚕豆要落市个辰光，姆妈就会买弗少个老蚕豆，拿俚剥出豆瓣来用水煮熟，焖烂，加面粉一淘拌匀，做成小方块个酱黄糕，让俚发霉，放到敞口个陶缸里向，再加盐搭仔酱油，还要适当个加冷开水。勒空旷个地方放一只木头个三脚架，酱缸就架到三脚架浪。日里让太阳底下暴晒，垂夜块，要勒酱缸浪罩一只圆锥形状个白铁皮做个酱棚盖，隔开露水，防止雨水。为仔要避免苍蝇叮，要勒酱缸朗加一个透气个罩。箇个罩，现在大家侪会用消毒纱布、金属纱网，或者塑料纱网做一个比缸口大个罩，盖勒酱缸浪挡虫挡灰尘。
