评弹个基本演出啦，应该是以档为主。 对个。 所以我伲大家习惯去 ：哟，今朝夜里去看场戏吧。弗叫看场书嘅。书呢，就要听一档书。听书听书，哎，听书啘。所以最早个评弹呢侪是一个人就叫单档。今朝已经弗多见哉。哦呦单档啦弗容易个阿。单档倷去想呢，伲书场里向有呒不布景有呒不灯光，又呒啥道具个。单档就是靠一张椅子一把扇子 ，啊是阿。有辰光呢，一只场子里有四五百个人，有辰光要八九百人得了。八九百人全神贯注听倷一倌子讲。搿个单档啦， 所以说应该是比较全面，单档角色要分得清，生旦净末丑，说噱弹唱演，要有比较全面个艺术修养。 对 。弗然就达弗到。弗然就听众就要听得厌气，要打嗑充，要坐弗牢个走啘啊是 。所以单档表演艺术力是很强个。现在我伲请老听众听一段严雪亭同志格单档演出杨乃武。
[录音片段]
那么由两个人同台演出个呢就叫是双档。拿三弦个呢是上手，一个人坐勒下手个呢就是拿琵琶个。两个人合作叫双档。书个结构起讫呢一般有上手掌握。我伲内行讲起来呢上手打多。所以勒浪角色扮演浪向阿，可以根据书情需要来进行分工。有仔实梗个分工呢，上下手之间互相配合。哦呦搿是使说唱个艺术更加生动哉。但是搿双档呢，一定要配合得好，要互相默契。对，顶要紧啘 。顶顶要紧紧凑。嗯。实梗一来两个人赛过一个人啦。嗯。人家听了欢喜听。对。外加艺术感染力强。是啘。所以往往搿双档啦，倒是弗是希望经常拆拆拼拼、拼拼拆拆，搿个双档拼弗好个。哎。只有几十年个老双档呢，哈，经常个磨练，实梗一来珠联璧合，相得益彰呢，搿个双档是听勒斜气有味道。相互默契。啊呀呀，使得说唱个艺术呢，更加个生动。现在请老听众听一段张鉴庭、张鉴国说个《花厅评理》，搿全就是男双档个演出。
[录音片段]
后来呢，女演员增加哉。本来呢女演员呒不个。侪是男演员唱个。女演员有了。哎。评弹也产生了女单档了，也有女单档说唱弹词，也有女个讲评话。女单档往往呢，要有个男单档弗同个风格搭子特色。那么可以显示女单档个特点。开始辰光，男归男，女归女。后来呢，有发展，现在呢，伲请听一段黄静芬同志演唱个《四进士》：
[录音片段]
搿么，男归男女归女呢，后来就发展成为男女演员拼成功双档。现在是比较普遍个男女双档。大部分侪是实梗。一般呢总归是男演员担任上手，女演员担任下手。有男演员起男角色，女演员起女角色，实梗角色分清爽哉。不过有辰光呢，上手男个呢也要起起女角色个。该个是特殊情况。所以现在一般来讲呢，侪是男个做上手，女个做下手。搿么，啊有个把女个做上手，男个做下手个呢？最近我搭伲个师妹朱雪琴拼过个《珍珠塔》么，就是伊做上手我做下手个。不过，该个是难得咯，特殊个。所以男归男，女归女，男演员起男角色，女演员起女角色。特别勒浪说唱反应现代生活为题材个数目中呢，就比较方便适合了。现在我伲请大家听一段赵开生搭石文磊唱个《青春之歌》：
[录音片段]
该个里向呢赵开生起个余永泽，石文磊起个林道静。两家头个分工非常明确而且恰当。勒浪说唱浪向呢由于增加了音色个对比呐显得格外丰富多彩。那么，也有女演员担任上手个。如果下手也是女演员，就拼女双档的了。搿女双档，现在也有好几档。好哉，现在伲下头就请老听众听一段魏含玉搭侯小莉（*）女双档演出个《绝交裂卷》。
[录音片段]
所以单档搭双档弗但是演出人数浪个差异啦。勒结构浪向、表演手法浪向也弗一样。过去有为老艺人讲单档难于弗寂寞，双档难于同话。就是讲单档啦，倷一倌仔，几百个人听倷，要是观众弗感觉到寂寞，搿个是要有大本事弗容易嘅。双档难于同话呢，双档两个人要能够混为一体啦，也弗是桩简单个事体。如果搿个两种形式掌握得好单档可以一人多角，说表灵活更加描摹细腻、刻画入微。双档搭配紧凑配合默契、生动闹猛。所以后来呢，叫啥产生仔三个档哉。哪哼三个档呢，勒上手搭下手之外再加一个人。角色多个辰光呢，就由三家头来分担脱。后来所以伲中篇评弹当中呢，为仔要紧缩时间呢，又增加到四个人。喏，就是方才唔笃两位同学看见个《真情假意》第一回里向个四个档。现在呢，我伲请唔笃听一段《林冲·山神庙》里向个一段，就是由刘天瑞、蒋月泉、周文瑞三家头以三个档形式演出嘅。
[录音片段]
评弹知识讲座呢今朝就到此地。